Maestrang nangabit giimbestigar

CEBU, Philippines - Gipaatubang na kagahapon sa Lupong Tagapamayapa sa barangay Kalunasan, dakbayan sa Sugbo ang usa ka maestra sa daycare ug ang mga mipetisyon niini nga pabalhinon sa laing lugar gumikan sa giingong pakigrelasyon niya sa usa ka barangay tanod.

Didto sa barangay hall sa Kalunasan walay laing gihimo ang maestra kansang ngalan gipugngan sa mga tigbalita gawas sa pagpanghimakak sa maong pasangil.

Hinuon nagdumili siya sa pakighinabi sa mga sakop sa media apan ang mga ginikanan sa iyang mga tinun-an maoy miatubang kaniya.

Usa sa mga mipetisyon nga si Adelfa Salvador misaysay nga giingnan sila sa maong maestra nga pasakaan sila og kaso, apan iyang giklaro nga wala siya mahadlok niini.

Sumala pa ni Salvador nga daghan ang nakakita nga kanunay nga magkuyog ang maong maestra ug ang tanod.

Gani ang iyang grupo adunay gitipigan nga mga hulagway nga nagpamatuod sa pakigrelasyon sa maong maestra ngadto sa tanod.

Matud pa ni Salvador nga igo ra silang misulti sa tinuod kay nakita nila nga dili maayong ehemplo ngadto sa kabataan ang gibuhat sa maong maestro “kay isip modelo dili siya angay mobuhat og bati nga butang,” matud pa ni Salvador.

Gihimakak usab ni Salvador ang nadunggan niya nga taho nga matud pa nga namirma sila sa petisyon batok sa maong   maestra kay gihatagan sila og bugas.

Matud pa ni Salvador nga ang tuyo lang nila nga mohunong sila (ang maestro ug tanod) sa ilang relasyon tungod kay pulos sila mga minyo.

Sayo niini gihangyo sa grupo sa mga inahan sa Kalunasan nga ibalhin og laing sentro ang maong maestra, apan nagpabilin pa gihapon kini sa Kalunasan kay wala pay mando gikan sa Department of Education (DepEd)

Sa pagkakaron gihuwat sa mga mipetisyon ang opinyon sa Department of Social Welfare and Services (DSWS), ug sa (DepEd) diin nila iduso ang maong reklamo batok sa nahisgutang magtutudlo.(/WC)  (BANAT NEWS)