Fraternity group sa Carcar gimonitor

CEBU, Philippines - Gimonitor karon sa kapolisan ang mga nagkalainlaing tulunghaan sa dakbayan sa Carcar aron pagsumpo sa magkaribal nga mga grupo sa fraternity kinsa magpunay lang og hinagitay aron magkamatay. Matud pa ni   C/Insp. Teodulfo Manatad III sa Carcar Police Station nga ang maong lakang maoy ilang tubag sa mando ni Mayor Necipuro Apura nga palusaron sila og surprisang pagpanuroy sa mga eskuylahan sa dakbayan karong nagsugod na ang klase sa mga tinun-an.  

Gusto sa mayor nga masumpo na ang dugoong panghitabo sa maong dakbayan human sa nagsunodsunod nga pinusilay ug pinatyanay sa miaging buwan diin usa sa mga biktima mao ang iyang anak nga si anhing Carl Vinson Apura.

Ang batan-ong Apura didto pusila sa sitio Upper Taug, barangay Valladolid Carcar atol sa usa ka pasundayag sa live band concert .

Hinuon si Mayor Apura mibutyag sa Banat News nga sa pagkakaron malinawon ug hapsay ang subling pagbukas sa klase sa publiko ug pribadong tunghaan sa dakbayan apan gusto lang niyang mahunong ang dinumtanay sa magkaribal nga grupo sa fraternity sa nagkalainlaing tulunghaan sa siyudad aron kalikayan ang pagbanaw sa dugo sa mga batan-on. (BANAT NEWS)