Survey sa senior citizen ilusad

CEBU, Philippines - Nangandam na ang buhatan sa Senior Citizens (SC) sa dakbayan sa Sugbo aron suhiron kun kining nadugang nga 3,000 ka mga SC karon tinuoray nga nagpuyo ning dakbayan. Si Jeffrey Ocampo piniyalan ni Mayor Michael Rama nga nadestino sa buhatan sa     Office for Senior Citizens' Affairs (OSCA) nagkanayon nga base sa ilang validation kun pagsusi   sa mga pinuy-anan niining mga tiguwanga ilang nasuta nga ang uban gikan sa kalungsoran sa lalawigan sa Sugbo, adunay gikan sa Negros, Leyte, Mindanao ug uban pa.

Maoy hinungdan nga sutaon nila matud pa ni Ocampo kun tinuod ba nga nagpuyo kining mga tawhana dinhi segun sa address nga gibutang nila sa ilang application form sa pag-apply nila pagkuha og ID sa buhatan sa OSCA.

Kini tungod kay nabaniog na pag-ayo nga may mga SC nga ania karon sa Sugbo nga migamit lang sa address sa ilang mga anak nga ania magpuyo dinhi apan ang tinuod tua sila sa ubang lugar unya moanhi lang sa siyudad kun manghatag na sa mga benepisyo ang kagamhanan.

Samtang si City Administrator Jose Marie Poblete mimando sa mga opisyal sa barangay nga kinahanglan nga motabang sa ebalwasyon sa mga residente nila nga SC sanglit sila man maoy suheto ug nakaila gyud sa ilang mga konstituwente.

Matud pa ni Poblete nga importante kaayo ang kooperasyon sa barangay aron dili mausik ang panudlanan sa dakbayan. Dugang pa ni Poblete nga wala’y problema kaniya ang transferees basta sigurado lang nga nia sila sa siyudad magpuyo. (BANAT NEWS)