CEBU, Philippines - Nasikop pagbalik kagahapon sa buntag sa kapolisan diha sa barangay Talaytay, lungsod sa Argao ang usa ka 33-anyos nga piniriso kinsa nakaeskapo gikan sa Bogo detention cell sa milabay’ng adlaw.
Ang suspetsado kinsa gireklamo og qualified theft mao si Jerry Alcano Amit, lumad nga taga barangay Canbanwa, lungsod sa Argao apan atoa na manimuyo sa dakbayan sa Bogo.
Si PO2 Von Tecson, duty desk officer sa Argao Police Station sa pakighinabi niini sa Banat News kagahapon mibutyag nga niadtong Biyernes nakadawat sila og report nga dunay detainee sa Bogo Police Station nga nakaikyas ug diha mipaingon sa Argao.
Matud ni Tecson nga dunay silingan sa suspetsado diha sa Argao ang mi-report sa mga polis nga nakita nila si Amit diha sa ilang lugar nga giingong napriso man kini ug daghang nahadlok niini tungod kay daw nalisoan og pangisip.
Gawas niini ang amahan sa suspetsado nangayo og tabang sa ilang silingang retiradong polis nga si Zorobabel Oyangorin aron masikop og balik ang iyang anak, si Oyangorin mao nay mitawag sa kapolisan.
Ang kapolisan sa Argao pinangulohan ni SPO1 Arnold Abiner ug mga polis sa Bogo miadto kagahapon sa buntag sa gitagoan ni Amit nga miresulta sa pagkasikop niini.
Ang hepe sa Bogo Police Station nga si Chief Inspector Ceferino Tabay Jr., sa oras sa pagsuwat niining balita dihang gitawgan sa Banat News wala makahatag og detalye kabahin sa pagkaeskapo ni Amit.
Misaad kining motawag sa Banat News kun makompleto ang report ug makahatag sila sa provincial headquarters. (BANAT NEWS)