3 babayeng Ugandan gipapriso

CEBU, Philippines - Tulo ka mga babayeng Ugandan nationals nga pulos hubog ang diretso sa prisohan sa Presinto 2 sa dakbayan sa Mandaue human ireklamo sa drayber sa taksing ilang gisakyan nga wala sila mamelete ug gisukahan pa ang iyang sakyanan.

Ang tulo giila ni SPO2 Dindo Montesclaros nga mao sila si Lielie Betty, 19, Laibane Kandi, 22, ug Pecias Kumabone, 20, pulos dalaga ug temporaryong nagpuyo sa dakbayan sa Sugbo.

Si Felix Tugabong, nga drayber sa taksi maoy mireklamo sa tulo tungod kay giingong wala kini mobayad sa P2,000 nga danyos sa iyang sakyanan ug pletihan sa taksi.

Matud pa ni Montesclaros nga misakay ang tulo ka mga langyaw sa dalan Banilad, dakbayan sa Sugbo nga gikan pa nga migawas sa usa ka balay kalingawan sa maong dapit ug nagpahatud sa Mandaue.

Apan ang usa kanila nga hilabihan ang kahubog nagsuka sa sulod sa taksi ug wala na sila pareho makatultol pa kun asa manganaog hinungdan nga gilahos nalang kini ni Tugabong paghatud sa Presinto 2 sa barangay Subangdaku. Ang tulo gipaubos sa liquor test ug migawas nga hubog gyud sila hinungdan sa ilang pagkatanggong sa karsel. (BANAT NEWS)