Lalaki patay sa riding in tandem

CEBU, Philippines - Patay ang usa ka 31-anyos nga lalaki human kini pusila sa wala mailhing mga kriminal kagahapon sa hapon diha atubangan sa iyang balay sa barangay Tungkop, lungsod sa Minglanilla.

Ang biktima mao si Jobert Aurilio, residente sa maong dapit nakaangkon og samad pinusilan sa tuong bahin sa liog ug tuong aping ug daling gidala ngadto sa South General Hospital sa dakbayan sa Naga apan nakabsan gyud kini sa kinabuhi diha sa maong tambalanan. Na-recover sa mga polis gikan sa lugar nga nahitaboan ang duha ka slugs ug duha ka kabhang sa kalibre .45 nga pistola.

Si Chief Inspector Timmar Jomio Alam, hepe sa Minglanilla Police Station sa pakighinabi niini sa Banat News kagahapon nagkanayon nga sa wala pa mahitabo ang insidente si Aurilio naglingkod sa gawas sa ilang balay dihang tulo ka wala mailhing lalaking nagsakay og usa ka motorsiklo ang kalit lang mitungha. Ang duha ka mga angkas sa maong motorsiklo nanganaog ug sa walay igong rason mipauwan og bala ngadto sa biktima.

Human og pamusil ang mga kriminal misakay og balik sa motorsiklo dali kining mibiya sa lugar patubang ngadto sa national highway.

Matud ni Alam nga nagpahigayon pa sila og follow-up nga imbestigasyon pagsuta sa motibo sa hitabo ug pag-ila sa mga mamumuno.  (BANAT NEWS)