BJMP wa mosunod sa standards

CEBU, Philippines - Wala makasunod ang Bureau of Jail Management and Penology (BJMP) - 7 sa international standards kabahin sa paghipos sa mga piniriso matud sa Commission on Human Right (CHR) -7.

Ang CHR-7 regional director Alejandro Alonso Jr. mibutyag nga wala masunod sa BJMP-7 ang “international minimum standards for the treatment of prisoners.”

Matud ni Alonso nga base sa international standards, kinahanglan nga dili maghuot sulod sa mga prisohan ang mga piniriso aron malikayan ang pagtinakdanay sa mga sakit, paigo ang tubig ug limpyo ang mga pansayan.

Gibutyag usab ni Alonso nga sayop ang kasagarang disenyo sa mga prisohan dinhi sa nasud kay ang kasilyas naa sa mga selda maong dako ang kahigayong magsakit ang mga priso.

“Ang nawagtang ra nila mao ang right to liberty according to due process. They still have their basic rights,” asoy pa sa director.

Ang Deputy Regional Director for Administration sa BJMP-7 Supt. Efren Nemeño ang miangkon sa Banat News nga sagad gyud sa ilang mga prisohan dinhi sa Central Visayas ang wala gyud makasunod sa minimum standards tungod sa kakulang sa pundo.

Matud ni Nemeño puno gyud ang 31 ka mga prisohan sa CV. “Congested na gyud ang atong mga jails but we are trying to decongest it by constructing more,” asoy pa ni Nemeño.

Nag-una sa ilang listahan nga labing naghuot mao ang Danao City Jail nga gihimo lang para sa 50 ka tawo apan kapin 200 na ang nasulod niini, sunod ang Cebu City Jail nga 1000 ray masulod apan karon kapin 2 mil na. (BANAT NEWS)