Dakpunong polis patahanon ni Buenafe

CEBU, Philippines - Gipasalig sa hepe sa Cebu City Police Office (CCPO) nga si Sr. Supt. Melvin Ramon Buenafe nga iyang itugyan sa korte si SPO2 Vicente Dacillo kinsa nalutsan og bench warrant sa korte human napakyas pagtambong sa arraignment sa iyang kaso niadtong Huwebes sa buntag.

Matud ni Buenafe nga ila pang gipangita si Dacillo aron patahanon apan kundili gyud kini boluntaryong motahan andam siyang modala niini aron itugyan ngadto sa huwes.

Ang huwes mimandong ipadakop si Dacillo kinsa gipasanginlang maoy mipusil patay sa usa ka ballot vendor tungod kay wala kini motambong sa iyang arraignment niadtong Huwebes.

Siya maoy gitumbok nga mipusil patay kang Primo Callego Jr., gawas sa ilang balay niini sa barangay Bulacao, dakbayan sa Sugbu niadtong Marso 20.

Si Regional Trial Court (RTC) Branch 16 Judge Sylva Paderanga niisyu og bench warrant aron sikopon si Dacillo nga sakop sa Punta Princesa Police Station.

Niluwat usab si Paderanga og kamanduan kang Dacillo nga mopasabot nganong napakyas siya sa pagtambong sa arraignment aron makombinse ang huwes nga di ma-forfeit ang iyang piyansa.

Si Dacillo daan nang mihimakak nga iyang gituyo ang pagpusil kang Callego ug self defense ra ang iyang gibuhat.

Matud ni Buenafe nga magsilbi kining leksyon sa ubang kapulisan nga dili angay ibalewala ang mga kamandoan sa korte, matud pa niya dili niya tabunan ang gibuhat ni Dacillo, gawas sa kasong criminal nag-atubang usab og kasong administratiba ang maong polis tungod sa maong kaso. (BANAT NEWS)