Sagad sa brgy. officials sa Talisay kabus base sa ilang SALN

CEBU, Philippines - Kasagarang mga opisyal sa kabarangayan sa dakbayan sa Talisay mga kabus, kini base sa ilang State of Assets and Liabilities and Networth (SALN) sa tuig 2011 nga gisumitir nila ngadto sa buhatan sa Department of Interior and Local Government (DILG).

Ang Talisay dunay 22 ka mga kapitan ug 154 ka mga kagawad diin si Kagawad Gilbert Cañizares sa barangay Dumlog kinsa dunay net worth nga P600 maoy labing kabus sa tanan.

Ang kapitan sa Dumlog ug presidente sa Association of Barangay Captain nga si Charles Basillote mideklarar kini og P94,000 sa iyang SALN.

Ang Dumlog usa ka average income nga barangay sa Talisay diin ang kapitan niini magdawat og P16,484 nga honorarium samtang ang mga kagawad makadawat og P12,000 nga honorarium matag buwan.

Sa iyang SALN, gideklara ni Cañizares ang iyaha lang cellphone, karsones ug polo nga mikantidad tanan og P14,600 ug liabilities nga P12,000.

Si Basillote kinsa milingkod isip ex-officio sa konseho sa siyudad ang mideklarar sa iyang personal nga kabtangan sama sa sapot, cellphone, appliances ug personal computer nga mokabat tanan ngadto sa P174,000 ug liability nga P80,000 gikan sa iyang personal nga mga loan.

Ang ubang mga opisyal sa kabarangayan nga mideklara og ubos sa tunga sa milyon sa ilang SALN mao sila si Nicasio Hermosa kapitan sa barangay Cansojong kinsa dunay P110,000; Jose Juarez sa barangay Tapul nga dunay P108,400; Dario Villaver sa barangay Mohon, P125,000; Marlowe Dagohoy sa barangay Biasong, P264,000; ug Victor Cabatas sa barangay Maghaway, P430,000.

Ang kapitan sa barangay Bulacao nga si Raul Cabañero maoy natalang labing adunahang kapitan sa siyudad diin mikabat ngadto sa P6.980 milyones ang iyang gideklarang net worth. Si Cabañero dunay mga lote ug mga building sa Bulacao nga mikabat tanan ngadto sa P4.5 milyones ug personal nga kabtangan sama sa sakyanan ug mga appliances.

Ang kapitan sa Jaclupan nga si Joel Orbiso duna kini P3.11 milyones nga assets ug walay liabilities. Samtang si Teodoro Belleza, kapitan sa barangay Poblacion duna kini P2.510 milyones; Kapitan sa Tanke nga si Perla Cabanes, P2.150 milyones; Antonio Cabrera sa San Roque, P1.540 milyones; Kapitan sa Lawaan nga si Delia Ybañez duna kini P1.384 milyones sa iyang SALN ug si Ofelia Ylanan kapitan sa Linao ug asawa ni city councilor Val Ylanan dunay P1.5 milyon nga SALN. (BANAT NEWS)