Ulitawo gibunlot sa okoy

CEBU, Philippines - Patay ang usa ka tawo nga gituohang gibunlot sa okoy busa nalumos samtang naligo sa Portofino Beach Resort sa barangay Mactan sa dakbayan sa Lapulapu sa miaging gabii.

Ang biktima mao si Ereneo Terol, 30 , ulitawo, nga lumad taga barangay Day-as sa lungsod sa Cordova ug nagtrabaho sa usa ka establisamento sa maong lungsod.

Si Sr. Insp. Zenaido Pastorfide Jr sa homicide section sa kapolisan sa maong dakbayan nga nahinabi sa Banat News miingon nga pipila sa kuyog sa biktima mao sila si Carin Montier ug Jesson Baring, mga kauban niini sa trabaho nga nag-night swimming sa maong higayon.

Una sila manawom    sa dagat, nag-inom pa sila og alak human sa ilang panihapon .

Matud pa ni Senior Inspector Pastorfide base sa asoy nila ni Baring ug Montier nga samtang naglangoylangoy silang tulo sa dagat kalit lang nawagtang ni Terol. Busa dali nila kining gipangita uban sa mga kaubanan    sa grupo ug didto napalgan nilang naglutaw na nga patay na.

Gituohan sa mga kauban nga gibira sa okoy ang biktima apan gisugyot   sa kapolisan nga ipa-autopsy ang biktima pagsuta nga walay foul play ang kamatayon niini.(/WC)  (BANAT NEWS)