Dugang 18 ang nataptan og HIV/AIDS sa Sugbu

CEBU, Philippines - Nadugangan og 18 ka bag-ong kaso sa human immune-deficiency virus/acquired immune deficiency syndrome (HIV/AIDS) ang Sugbo sukad niadtong Enero hangtud Mayo 2012, sumala pa sa AIDS-Free Philippines (AFP).

Kini nakadugang sa 538 ka kaso sa Sugbo nga natala ug giatiman sa AIDS-Free Philippines. Matud pa ni Dr. Rene Josef Bullecer, nasudnong pangulo sa Aids-Free Philippines nga sa 18 ka kaso, 16 niini mga lalaki samtang duha ang babaye, pulos mga nagtrabaho sa gawas sa nasud.

Ang Sugbo adunay 19 porsiyento sa tanang kaso sa Central Visayas nga naglangkob sa 21 porsiyento sa kinatibuk-ang gidaghanon nga 1,232 nga bag-ong kaso sa Pilipinas sugod niadtong Enero.

Matud pa ni Bullecer nga sa 538 ka kaso sa Sugbo, 499 mga lalaki ug 39 mga babaye samtang 54 na ang patay.

Ang katapusang namatay natala niadtong Abril 17 sa Vicente Sotto Memorial Medical Center hinoon dili taga Sugbo.

Usa sa mga hinungdan sa pagtakod niini mao ang paggamit og parehong syringes sa mga addict nga mag-inject og ilegal nga drugas, pagkighilawas sa parehong lalaki, blood transfusion, ug natakdan tungod sa mga ginikanang infected niini. Samtang wala pa’y tambal sa maong sakit, si Bullecer nagkanayon nga ang pag-edukar ilabi na sa mga kabatan-onan ang makapugong sa pagkuyanap niini.  (BANAT NEWS)