DPWH flyover project gibasura

CEBU, Philippines - Gibasura sa Regional Development Council nga gipangulohan ni Mayor Michael Rama ang laing duha ka mga planong tukorong flyover nga gipresentar sa Department of Public Works and Highways.

Sumala pa ni Rama nga gawas sa Infrastructure Development Committee sa RDC, kinahanglan nga mangayo og endorsement ang DPWH sa kagamhanan sa siyudad sa Sugbo ug dili mag-unauna o magbuotbuot.

Matud pa sa mayor nga hagbay rang nasayod ang katawhan sa pagsupak niya sa duha ka flyovers sanglit dili kini ang labing importante karong panahona.

Ang RDC mipahigayon og tigom kagahapon sa usa ka hotel dinhi sa dakbayan kung diin nalakip sa agenda ang proposal sa mga proyekto sa DPWH ug pipila niini mao ang flyover duol sa St. Joseph the Patriarch Parish sa Mabolo ug sa Cardinal Rosales Avenue-F. Cabahug Street duol sa Carmelites Monastery.

Wala mahimuot si Rama sa pagsige og pamugos sa DPWH sa flyover, gani wala pa masulbad ang isyu sa planong tukoron nga flyover sa maong ahensya sa dalan MJ Cuenco ug Gorordo.

Matud pa sa mayor nga mas maayo ang master traffic plan ug ang road widening sanglit mao kini ang gikinahanglan sa pagsulbad sa problema sa trapiko ug dili ang flyovers.

Nagkanayon si Rama nga ang drainage project maoy labing importante apan P15 milyon lang ang gitaganang budget sa DPWH apan ang mga flyover moabot ngadto sa kapin sa P200 milyones matag usa. (BANAT NEWS)