Rama ok na sa partido ni Cuenco

CEBU, Philippines - Gihangop ni Mayor Michael Rama ang desisyon ni kanhi Kongresista Antonio Cuenco sa pagsagop sa Partido Demokratiko Pilipino-Lakas ng Bayan (PDP-Laban) ug andam na kini sa pagbalhin sa maong partido.

Hinuon  sa bahin ni Rama, kini nagkanayon nga magpabilin gihapon siya sa Liberal Party (LP) tungod kay wala siya’y igong rason nga mobiya   sa maong partido nga maoy politikanhong grupo nga gipasakopan ni Presidente Noynoy Aquino.

Matud pa ni Rama nga dakong garbo alang kaniya nga dalhon siya sa duha ka dagkong partido sa piniliay karong   tuig 2013.

Gimandoan usab ni Rama ang iyang mga kaalyado nga magpabilin gyud sa LP ug iyang gitataw nga dili kini mahimong babag sa panag-alyansa nila ni Cuenco.

Dugang pa niya nga dili na bag-o ang kowalisyon sanglit mao man usab kini ang senaryo sa nasudnong election kung diin ang grupo sa mga mokandidato sa pagka- senador naggikan sa nagkalain-laing partido.

Samtang gitataw sa mayor nga wala siya mahulga sa nagpadayon karon sa pagpakatap sa mga propaganda material sa kaatbang niya sa politika.

Matud pa ni Rama nga naa sa katawhan ang final nga hukom sanglit katungod nila ang pagpili sa himuon nila nga mga leader sa gobiyerno. (BANAT NEWS)