School bus sa USJ-R may kuwang

CEBU, Philippines - Human sa kinalit nga inspection sa Land Transportation Office ug Land Transportation and Franchising Regulatory Board (LTFRB) usa sa duha ka unibersidad sa dakbayan sa Sugbo nasuta nga may kakulangan sa mga kahimanan sa gipadagan nilang sakyanan sa eskuylahan.

Si LTFRB Regional Director Ahmed Cuizon, mibutyag sa Banat News sa giuna nila pagbisita kagahapon sa alas 8:00 sa buntag ang University of San Jose Recoletos (USJR) diin didto nasuta nila nga pipila sa mga sakyanan niini walay fire extinguisher, walay first aid kit ug ang uban kulang usab ang grill sa bintana.

Hinuon matud pa ni Cuizon nga ginagmay ra ang maong mga kuwang gani, nakadayeg siya sa maong tunghaan tungod kay tanang sakyanan niini pulos adunay prangkisa.

Samtang si manlalaban Jesus Velez ang Student Affairs Office Administrator mibutyag sa Banat News nga andam sila sa pagtuman unsay gimando kanila sa LTFRB ug LTO sama niining nakita nila nga mga kakulangan sa ilang mga school bus. Matud   pa ni Velez nga iyang ipaabot ngadto sa mga opisyal sa eskuylahan ang nadiskobrehang kakulangan sa ilang mga sakyanan atol sa meeting nila   karong adlawa. Ang ikaduhang tunghaan nga giduaw sa LTO ug LTFRB mao ang CIT University apan wala silay naabtan nga mga school bus sa maong unibersidad.

Apan bisan pa niini, gihimamat sa mga kadagkuan sa LTO ug LTFRB   ang mga opisyal sa maong tulunghaan kinsa mitug-an kaniya nga wala kaayo sila masayod sa pamaagi sa pagdumala sa school bus. Tungod niini, ang CIT University gidapit sa maong mga opisyal nga makig-estorya sa tanang mga opisyal sa tulunghaan sa katapusan niining buwana.

Miingon usab si Cuizon nga sa ilang gihimong surprise inspection sa mga tunghaan, nakig-alayon usab sila sa    taga Department of Education. (/WC)(BANAT NEWS)