Mopetisyon aron pletihan paubsan

CEBU, Philippines - Usa ka grupo sa mga konsumidor sa Sugbu ang nagplano karong mopasaka og petisyon aron mapaubsan pa og P.50 ang pletihan sa jeepney tungod sa padayong pag-ubos sa presyo sa produktong petrolyo.

Buot usab sa grupo nga awtomatikong imando sa Land Transportation, Franchising and Regulatory Board nga paubsan ang pletihan matag moubos ang presyo sa petrolyo.

Si Consumers Rights for Economic Welfare president Vicente Sapio nagkanayon nga sa iyang panglantaw kinahanglan na gyung paubsan ang minimum nga pletihan og P.50.

Si Valenzuela City Mayor Sherwin Gatchalian, sa linaing interbyu miingon nga ang LTFRB isip maoy tigpaminaw sa mga petisyon sa transport groups kinahanglang mao usab ang awtomatikong mopaubos sa pletihan matag dunay pag-ubos sa presyo sa petrolyo.

Matud pa ni Gatchalian dili na unta kinahanglanon pa sa LTFRB nga magpaabot nga dunay mopetisyon. "That should be automatic. That's their job."

"We have to be fair to the commuters as well," pasabot pang Gatchalian.

Apan si Ryan Banjamin Yu, ang chairman sa Cebu Confederation of Transport Operators and Drivers Inc.miinsister nga bisan sa pagbarato na sa produktong petrolyo dili pa gyud kini tukma aron paubsan ang pletihan.

"We will see. I think it is still premature to discuss rollback," matud pa ni Yu kinsa miingon nga ang krudo kapin P40 pa gihapon ang presyo matag litro. Matud niya kinahanglang mous-os pa og P7 o P38 matag litro una pa sila mosugot nga paubsan ang pletihan.

Si Romeo Armamento, ang presidente sa Mandaue United Drivers Association miingon nga dili nila babagan kun dunay petisyon ang mga konsumidor.

"Ipa-file lang ila petition kay e-hearing ra man na og may merit ila petition," matud pa ni Armamento.

Apan naobserbahan nga ang mga jeepney drivers ug mga konduktor bisan sa kamandoan sa LTFRB nga ibalik sa P7.50 ang minimum nga pletihan nagpaugat gihapon sa pagpaningil og P8.00.

Ang maong gibuhat sa mga drayber nga maisip nga ‘overcharging’ wala aksyoni sa LTFRB tungod kay walay pormal nga misang-at og reklamo sa ilang buhatan. Pipila ka mga pasahero bisan sa kasagmuyo mas piliong dili na lang magtagad nungka makakita og lalis tungod lang sa P.50 tungod kay ang mga pasahero ang sumbalikon sa mga drayber nganong wala magdala og tag P.25 sentimos. (BANAT NEWS)