Tambalanan sa Liloan gipalapdan ang serbisyo

CEBU, Philippines - Gipalapdan sa kagamhanan sa lungsod sa Liloan ang serbisyo sa Liloan Community Medical and Emergency Center (LCMEC) sa ingon mahatagan sa maayong serbisyo ang katawhan sa lungsod ilabi na ang mga kabus.

Natukod ang Liloan Community Medical and Emergency Center gumikan sa paningkamot ni Mayor Vincent Franco "Duke" Frasco nga gitabangan sa Probinsya sa Sugbo pinaagi ni Gobernador Gwendolyn Garcia.

Una kining natukod sa lungsod sa Liloan hadiin gitumong aron mahatagan sa maayong serbisyo ang mga pasyente nga gikan sa lungsod.

Aduna kini emergency room nga bukas 24-oras, adunay botika, intensive care unit alang sa mga talandugong kahimtang sa panglawas.

Gipahibawo ni Mayor Frasco nga ang serbisyo sa panglawas mao gyud ang usa sa gihatagan pagtagad sa iyang administrasyon nga naglakip sa paghatag og hinabang sa mga taga Liloan nga madala sa Vicente Sotto Memorial Medical Center.

Pinaagi sa LCMEC maatiman dayon ang mga pasyenteng wala na magkinahanglan pang dad-on sa VSMMC. (BANAT NEWS)