Daghang tunghaan apan gamay ang school buses

CEBU, Philippines - Naalarma ang Land Transportation and Franchising and Regulatory Board tungod kay 179 lang ka school buses ang dunay prangkisa sa dakbayan sa Cebu, Mandaue, Lapulapu ug Talisay apan daghan kaayong mga tunghaan sa maong mga siyudad.

"We are alarmed kay daghan kaayo ta og mga eskwelahan in these places unya mao ra ni ang mga school buses nga naay franchise," matud pa ni LTFRB-7 regional director Ahmed Cuizon.

Matud pa ni Cuizon sa 179 school buses, 132 niini nia sa Cebu City, 19 sa Lapulapu City, 18 sa Talisay City ug napulo sa Mandaue City.

Si Dr. Milagros Gabia, Department of Education-7 chief for planning policy and research division dunay 372 ka tunghaan sa maong upat ka siyudad gikan sa elementarya pribado man o publiko, 239 usab ang pribado ug publikong high schools o 611 ka mga tunghaan.

Ang Cebu City dunay 175 ka elementarya (69 publiko ug 106 pribado) ug 122 sa high school (54 publiko ug 68 pribado); sa Mandaue, 64 elementarya (27 publiko ug 37 pribado), 41 ka high school (16 publiko ug 25 pribado).

Sa Lapulapu City, 80 ang elementarya (44 publiko ug 36 pribado), 41 high school (25 publiko ug 16 pribado) samtang sa Talisay City, 53 ang elementarya (25 publiko ug 28 pribado), 35 high school (18 publiko ug 17 pribado).

Matud ni Cuizon sugod karong adlawa Hunyo 13, 2012, sugdan nila ang inspeksyon sa mga school buses nga maglakip kung duna kini prangkisa, luwas bang sakyan, kasaligan ang drayber ug uban pa. Multa nga P6,000 o ba kaha ma-impound sa LTFRB ang walay prangkisa, kinahanglang duna silay fire extinguishers, exit point sa tuong kiliran, ug uban pa.

"We will also check if these school buses especially those being used by the pre-elementary and elementary have proper railings on the bus window kay kung wala na magki-at ra baya nang mga bata. Kuyaw ug manggawas na sa bintana," ni Cuizon pa.

Ang prangkisa nga nagkantidad og P10,000 balido sulod sa lima ka tuig matag usa. (BANAT NEWS)