Ang Kasaysayan

CEBU, Philippines - 1898 — Gideklarar ni General Emilio Aguinaldo ang kagawasan sa Pilipinas gikan sa mga mananakop nga Espanyol diha sa balkonahe sa iyang mansion sa Kawit, Cavite human mapildi sa Battle of Manila ang Espanya batok sa mga Amerikano. Apan ang deklarasyon wala ilha sa Espanya ug Amerika, gibaligya hinuon sa Espanya ang Pilipinas ngadto sa Amerika pinaagi sa Treaty of Paris diin pormal nga natapos ang Spanish-American War. Hinuon giila sa Amerika ang kagawasan sa Pilipinas niadto nang Hulyo 4, 1946 sa Treaty of Manila. Apan tungod sa tambag sa mga historians, si Presidente Diosdado Macapagal milagda sa Republic Act No. 4166 nga naghimo sa Hunyo 12 nga adlaw sa Kaugalingnan sa Pilipinas (Philippine Independence Day), karong adlawa usab gisaulog ang Flag Day ug ang tanan gidasig pagbutang og mga Bandila sa Pilipinas.

1979 — Niining adlawa malampusong milupad ang Gossamer Albatross nga mitabok sa English Channel. Ang nakapahimong mahinungdanon niini mao nga ang maong abyon walay makina, gipalupad lang kini pinaagi sa sikad sa tiil sama sa pedal sa bisekleta sa cylist nga si Bryan Allen.

1913 — Ang unang modernong teknik paghimo og animated cartoon nga pelikula sa U.S. gipailaila ug gipalisensyahan ni John Randolph Bray. Ang unang animated cartoon nga migamit sa maong teknik mao ang The Artist's Dream nga naila usab sa titulong The Dachsund diin gipakita ang iro nga mikaon og mga sausages hangtud nga mibuto ang tiyan niini tungod sa kabusog. Ang maong teknik nga mao gihapon karon ang gigamit sa paghimo sa pipila ka mga animated cartoon mao ang pag-drawing og daghang karakter nga nag-usab usab ang posisyon nga padaganon pinaagi sa pagpakli sa mga pahina. (BANAT NEWS)