Koleksyon sa South terminal misaka

CEBU, Philippines - Misaka na usab ang koleksyon sa Cebu South Bus Terminal (CSBT) human sugdi sa pagpatuman ang pagkolekta og bayad kutob sa mga taxi nga mosulod sa maong terminal nga gidumala sa kagamhanan sa lalawigan.

Matud pa ni Carmen Quijano, operation manager sa CSBT nga midako pag-ayo karon ang ilang koleksyon gikan niadtong buwan sa Abril niining tuiga dihang gisugdan nila pagpatuman ang balaod nga pabayron ang mga taxi nga mosulod sa terminal nga maghatod og pasahero o kaha magpaabot og pasahero sulod sa terminal.

Si Quijano mitumbok nga niadtong   buwan lang sa Abril mikapin sa P15 mil   ang ilang nakolekta, sa Mayo miabot   usab og dul-ang P30 mil, ug niining   buwana Hunyo, mikapin na sa P40 mil ang ilang nakolekta gikan sa mga taxi.

Matud ni Quijano nga pinaagi sa pagbutang og Taxi Stand sulod sa terminal, gitugotan na nga makasulod ang mga taxi sa sulod niini, apan may bayad aron mohatod og pasahero o kaha magpaabot og mga pasahero nga manaog gikan sa bag-ong mangabot nga mga sakyanan gikan sa habagatan.

Tungod niini, giplanohan karon sa kagamhanan sa lalawigan sa Sugbo nga ayuhon ug paninduton ang Taxi Stand aron mapahiluna ug mapandungan ang mga driver sa taxi ug mga kolektor sa terminal alang sa mas maayong serbisyo niini sa katawhan. (BANAT NEWS)