Eksamin sa Civil Service gitakda

CEBU, Philippines - Tulo ka mga eksaminasyon ang gitakda sa Civil Service Commission (CSC)7 niining tuiga alang sa mga manarbaho sa mga ahensya sa kagamhanan.

Si Bernadette Prado sa CSC 7 mibutyag kagahapon nga human sa Career Service Examination for Professional and Sub-professional niadtong Mayo 19, 2012, may umaabot na usab nga eksamin alang sa Stenographer karong Hulyo 10, samtang ang Penology examination gitakda usab sa Hulyo 12, ug ang ikaduha nga Career Service Examination for Professional and Sub-Professional niining tuiga gitakda usab  nga ipahigayon unya sa October 21, 2012.

Matud pa ni Prado nga ang deadline sa pagpanawat sa CSC sa mga application alang sa mokuha sa Stenographer examination mao ang Hulyo 19, 2012, samtang ang sa Penology Examination, Hulyo 28, 2012, ug ang sa Career Service sa Septembre 6, 2012 usab.

Mitug-an usab si Prado nga sa Career Service exam niadtong Mayo 19, 2012, may pipila ka mga aplikante ang wala makasalmot sa maong eksamin gumikan sa nagkalainlaing hinungdan busa na-forfeit o naiya na sa hingpit sa CSC    ang ilang gibayad nga P500, ug kun mokuha sila karong Oktobre nga eksamin, mobayad na usab sila og laing P500. Apan matud niya nga mikabat gyud sa 95 porsento ang tanang nakakuha sa maong eksamin.

Midugang usab siya nga ang resulta sa maong eksamin madawat sa mga mikuha niini unya sa buwan sa Agosto niining tuiga.

Giawhag ni Prado ang mga mokuha ning mga eksamin nga ipahigayon sa CSC nga mangandam pag-ayo pinaagi sa pagkuha og application form gikan sa ilang buhatan sa Kapitolyo o kaha sa ilang regional office sa may Ecotech Center sa Lahug, ning dakbayan sa Sugbo. (BANAT NEWS)