18 ka vintage bomb gihiposan

CEBU, Philippines - Mokabat sa 18 vintage bomb nga gidekorasyon sulod sa Lahug Elementary School   gitunol ngadto sa kapolisan kagahapon aron mahiposan.

Si Sr. Supt. Melvin Ramon Buenafe, hepe sa Cebu City Police Office (CCPO) maoy nangunay sa pagkuha sa maong mga bomba nga didto ipamutang libot sa flag pole sa maong tunghaan.

Si Buenafe nanguna sa mga sakop sa Special Weapon and Tactics (SWAT) nga maoy gitahasan sa pagkuha sa maong mga bomba ug anaa kini karon sa ilang kostudiya.

Si Manuel Indig, usa ka retired industrial arts teacher nagkanayon nga ang maong bomba gihimo nilang dekorasyon sukad pa niadtong 1951 sa flag pole sa eskuylahan.

Apan ila kining gipakuha niadtong 1997 kay giaspalto ang palibot sa maong tunghaan.

Sukad niadto, ila kining gibutang sa stock room ug niadto lang miaging semana nakahukom sila nga ihatag ngadto sa kapolisan.

Matud ni Buenafe nga ila kining hiposon aron mahatagan og kalinaw ang mga huna-huna sa mga magtutudlo ug estudyante sa maong tunghaan.  (BANAT NEWS)