CEBU, Philippines - Maayong pagkababha sa ulo sa usa ka mag-uuma nga gi-shotgun atubangan sa mga kainom diha sa sitio Tillins sa barangay Biga sa siyudad sa Toledo niadtong Domingo sa alas 10:00 sa gabii.
Ang biktima giila sa kapulisan nga si Dante Belicura Manolong, 42, nagpuyo sa nahisgutang lugar, samtang padayon pang giila sa kapolisan ang mamumuno niini nga daling nakasibat.
Matud ni SPO4 Carmelito Hornales ang desk officer sa Toledo City Police Station dihang nahinabi sa Banat News nakig-inom ang biktima sa tulo ka mga barkada sa gawas sa tindahan dili layo sa balay niini.
Wala makamatikod ang grupo sa pag-abot sa usa ka lalaking nagdala og shotgun ug sa kahadlok sa mga kainom nag-iyahay kini og panagan apan nagpabilin sa lingkuranan ang biktima.
Dihadiha gidul-itan og pusil sa ulo si Manolong ug pagkahuman yanong mibiya ang kriminal.
Ang kapolisan padayon pa sa ilang imbestigasyon pagtumbok sa motibo ug sa mamumuno. (BANAT NEWS)