17 ka dancer na-rescue sa polis

CEBU, Philippines - Dul-ang 20 ka babaye ang na-rescue sa mga sakop sa Regional Anti-Human Trafficking Task Force (RAHTTF) atol sa gipahigayong entrapment operation sa usa ka balay kalingawan sa General Maxilom Avenue ning dakbayan niadtong Biyernes sa gabii.

Nasikop sa maong higayon mao ang nagdumala sa maong balay kahilayan nga si Raquel Alcordo alyas Carla, 31,   nga taga dalan C. Padilla ning dakbayan ug Leonora Arsua alyas Cilda, 41, nga taga Pili, Kabankalan syudad sa Mandaue.

Ang RAHTTF milusad sa maong operasyon human makadawat og impormasyon kalabot sa mga illegal nga kalihukan sulod sa nahisgutang lugar.

Sa gihimong surveillance operation sa RAHTTF ilang nasayran nga ang trabaho sa mga babaye sa maong bar mao ang pagsayaw, apan kun bayran sa customer, tugotan usab kini sa tagdumala sa bar nga mokuyog sa customer aron pakighilawasan didto sa gawas.

Nasayran usab sa surveillance team nga dili lamang ordinaryong sayaw ang himoon sa maong mga dancer, kundili mopakita pa gayud kini sa pribadong bahin sa ilang lawas nga labing makapagana sa mga kustomer.

Lakip usab nga nasayran sa kapolisan mao nga kasagaran sa mga mitrabaho sa maong bar mga menor de edad nga nakapaalarma kanila hinungdan nga ila gilayon kining gipaabot ngadto sa ilang labaw   nga si Sr. Insp. Maria Theresa Macatangay.

Atol sa pagronda nila sa maong bar 17 ka mga babaye ang na-rescue sa kapolisan diin pipila niini mga menor de edad.

Ang kapolisan miduso sa ilang kasong Qualified Anti-Trafficking in Persons Act of 2003 ngadto sa korte batok sa mga tagdumala sa maong bar. (/WC) (BANAT NEWS)