Publiko gipahimangnoan bahin sa rabies

CEBU, Philippines - Ang Cebu Provincial Health Office Animal Bite Center mipahimangno sa publiko batok sa pinaakan sa iro tungod sa kakuyaw sa sakit nga rabies niini nga posibleng moresulta gyud sa pagkamatay.

Matud pa ni Dr. Cristina Giango, Integrated Provincial Office Chief sa probinsya sa Sugbo nga aduna sila’y adbokasiya nga Anti Rabies Campaign kung diin usa kini ka programa nga nagtumong sa pagpahibawo sa katawhan kung unsay buhaton aron malikay nga mapaakan og iro ug mataptan og rabies.

Giesplikar ni Giango nga ang rabies usa ka grabeng sakit nga makatakod ug makamatay tungod kay ang hinungdan niini mao ang virus nga anaa sa laway sa mga hayop nga may rabies.

Ang iro ug iring nga sagad naa ra sa komunidad dili immune sa maong sakit ug peligrong makatakod sa tawo kun sila makapaak o ba kaha mabutangan og laway sa maong hayop nga nagdala na sa maong kagaw ang abli nga samad sa tawo.

Ang timailhan o sintomas sa rabies mao ang paglabad sa ulo ug hilanat, sakit ug binhod ang pinaakan, magsalimuang ug maparalisa, paggimok sa kaunuran ug usab mahadlok og tubig ug hangin.

Gipahibalo ni Giango nga kun ang iro makapaak kinahanglang dili kini patyon ug obserbahan kini sulod sa 14 ka adlaw, kun kini magluya ug mamatay dakong purohan nga duna kini rabies ug nabutang usab sa peligro ang tawong napaakan o nalawayan niini.

Ang mga timailhan sa usa ka iro nga adunay rabies mao ang magmangtas kini, magpaghot ug magdagan-dagan nga walay direksyon, mamaak ug bisan unsang butang, magtulo ang laway, dili mokaon ug moinom ug mamatay sulod sa 14 ka adlaw.

Ang publiko gitambagan nga kung pananglit mapaakan man gani og hayop sama sa iro ug iring, kinahanglang hugasan dayon ang samad og sabon ug tubig, magpakonsulta dayon sa labing duol nga Animal Bite Treatment Center ug usab obserbaran ang iro nga nakapaak sulod sa napulo hangtod sa 14 ka adlaw.

Ang gobiyerno sa Pilipinas nagtinguhang mamahimong rabies free ang Pilipinas sa umaabot tuig 2015 hinungdan sa paghingusog karon sa kampanya sama sa pagpamakuna sa mga binuhing iro ug iring ingon man ang pagpakatap og impormasyon kabahin sa paglikay sa maong sakit. (EIM)(BANAT NEWS)