Video sa cybersex gisil-ing sa huwes

CEBU, Philippines - Gikalipay sa prosecution ang hukom ni Judge Silvestre Maamo sa Regional Trial Court 7 Branch 55 ang pagsil-ing sa video nga gihatag sa informant ngadto sa Provincial Commission for the Welfare of Children kalabot sa kasong cybersex sa lungsod Cordova.

Kini ang gibutyag ni Prosecutor Lolita Lomanta atol sa pakighinabi sa mga sakop sa media human sa hearing sa miaging adlaw sa kasong Qualified Trafficking In persons batok sa magtiayong mitugot sa ilang mga anak nga malambigit sa pornograpiya.

Matud pa ni Prosecutor Lomanta nga gusto nilang makita sa huwes ang maong video   kay ang unang huwes nga mikupot sa maong kaso wala man makahigayon sa pagtan-aw sa maong ebidensiya.

Sigun pa ni Lomanta nga importante kaayo ang maong video nga gi-record sa usa ka customer sa akusadong magtiayon kay makita usab sa korte kun giunsa pagpasipala ug pag-abuso ang mga biktimang bata nga anak ra usab sa maong mga akusado.

Dugang pa sa nahisgutang prosecutor nga ang ilang tinguha makasaksi gyud ang huwes sa maong video aron nga matimbang-timbang niini ang gibug-aton sa nahisgutang kaso. (BANAT NEWS)