Sr. Citizen sa Talisay makadawat og P2 mil

CEBU, Philippines - Sugod karong tuiga makadawat og tag-P2 mil ang matag senior citizen sa dakbayan sa Talisay.

Kini human kaaprobahi sa konseho sa dakbayan ang usa ka resolusyon kalabot niini nga giduso sa Federation of Senior Citizen sa siyudad nga gipangulohan ni Fe Yap.

Matud pa ni Yap nga tag-P1,000 ang madawat sa mag-birthday ug laing P1,000 ang madawat niini isip Christmas gift inigka-Disyembre.

Apan gawas niini daan nang naggahin ang kagamhanan sa dakbayan og P600 mil matag tuig alang sa tambal sa mga edaran sa maong dakbayan.

Ang Talisay may 22 ka mga barangay ug kutob sa buwan sa Marso niining tuiga, may 11,800 ka mga senior citizen ang narehistro sa buhatan sa Office of the Senior Citizen’s Affair (OSCA).

Matud pa ni Yap nga sa pagkakaron may 36 ka mga   kabus nga senior citizen sa dakbayan ang makadawat usab og tag P1,500 sa matag tulo ka buwan gikan sa Social Pension Fund.

Apan matud pa ni Yap nga ilang gihangyo ang DSWD nga unta pun-an kining maong gidaghanon bisan kutob lang sa 50 ka mga senior tungod sa kadaghang kabus nga mga tiguwang sa maong dakbayan. (BANAT NEWS)