2 ka tawo naghikog

CEBU, Philippines - Duha ka tawo ang giingong naghikog kagahapon sayo sa kaadlawon ug sayo sa buntag sa managlahing lugar sa dakbayan sa Sugbo.     

Ala-una kagahapon sa kaadlawon napalgang nagbitay na sa pisi si Leo Acruz, 34, usa ka welder, residente sa sitio Mahayahay, barangay Labangon, dakbayan sa Sugbo.

Napalgan kini sa iyang higalang si Ganny Omar, 25, kinsa moimbitar unta kaniya og inom apan pagsulod niya sa balay nahibulong siya nga ngitngit kay gipawong diay ang suga ug dihang iyang gipasiga nakugang siya nga nagbitik sa liog si Acruz. Dali niyang gitawag ang mga higala ug maguwang ni Acruz nga si Ricky ug gitabang kini apan patay na kini. Matud pa nga si Ricky mibutyag nga tiggamitan og illegal nga drugas ang igsuon ug duna kini problema sa hinigugma ug sa iyang trabaho.

Sa laing bahin, usa ka 21-anyos nga si Gerwin Bacalan ang gidudahang naghikog diha sa bungtod ug kasagbutang bahin sa sitio Kabading, barangay Sapangdaku, dakbayan sa Sugbo.

Si Bacalan nga usa ka drayber giingong adunay samad sa agtang nga gituohang napantok sa yuta. Adunay usa ka suicide note nga nabasahan ang mga imbestigador diha sa cellphone niini hinungdan nga nagtuo ang kapolisan nga posibleng naghikog gyud kini.

Na-recover gikan sa patay’ng lawas ni Bacalan ang Samsung cellphone, professional driver’s license ug puntil.

Ang mga residente diha sa lugar nga si Arquilardo Yucot, 40-anyos ug Sergio Torres, maoy mi-report sa hitabo sa Station 9 pinangulohan ni Chief Inspector Enrique Belciña.

Giingong nagbuy-od na si Bacalan diha sa maong lugar dihang iyang nabangalan. Matud pa ni Torres uwahi niyang nakitang buhi si Yucot niadtong Sabado sa kaadlawon human sila nag-inom ug miuna ang namatay og pauli. (BANAT NEWS)