Silot ug multa pagputol og lubi gipadak-an

CEBU, Philippines - Giaprubahan sa katapusang pagbasa diha sa Ubos Balay Balauranan ang House Bill 6131 nga nagtinguhang padak-an pa ang silot sa Republic Act 8048 o Coconut Preservation Act aron mamenusan ang pagpatuyang og pamutol og lubi aron himuong coco lumber. Kaniadto ang silot sa pagpamutol og punoan sa lubi kun mapamatud-an mapriso og dili momenus usa ka tuig apan di molapas og unom ka tuig o ba kaha pamultahon og dili momenus P50,000 apan di molapas sa P500 mil o depende sa korte kung ang duha ka silot iyang ipahamtang.

Apan sa naaprubahang HB 6131 sa Kongreso, ang mga malapason sa RA 8048 prisuhon og dili momenus duha ka tuig apan di molapas unom ka tuig o ba kaha multang dili momenus P100,000 apan di molapas sa P500,000 o ba kaha parehong ipahamtang sa korte.

Si Batangas Representative Mark Llandro Mendoza, ang Chairman of House Committee on Agriculture and Food maoy mi-endorsar sa HB 6131 ngadto sa plenaryo.

Samtang ang House Resolution 1689 nga gipasaka ni Rep. Danilo Suarez nag-awhag nga kinahanglan i-update ug patas-an pa ang bayad sa permit sa mamutol og punoan sa lubi tungod kay nagkataas na ang demand sa maong kahoy karon ug aron aduna magamit sa pagpananom og usab og lubi.

Sa press release nga gipagawas sa website sa Kongreso, si Suarez nagkanayon nga ang matag punoan nga putlon kinahanglang patas-an ang application fee gikan sa P25 ngadto sa P100.

“Of the amount, P40 shall accrue in favor of the Philippine Coconut Authority (PCA), P40 in favor of the municipal government concerned and P20 in favor of the barangay unit concerned,” matud pa sa press release. Ang gibayad ngadto sa PCA maoy gamiton alang sa replanting program ug bayad ngadto sa munisipyo aron ipaayo ang mga dalan. Kinahanglan usab nga ang punoan sa lubi moabot na og 60 ka tuig ug kadtong dili na gyud mamunga, naigo sa kilat, nadaot tungod sa katalagman mao ray putlon, ang pagpamutol himuon lang sa bulan sa Oktubre, Nobiyembre ug Disyembre.

(BANAT NEWS)