Panday nga di motiwas sa trabaho gisulong gipatay

CEBU, Philippines - Panday nga kusog mamakyaw og trabahoon apan gipasanginlang dili tiwason og trabaho gisulong ug gipusil patay sulod sa iyang balay sa barangay Kang-aktol sa lungsod sa Dumanjug niadtong Huwebes sa alas 2:30 sa kaadlawon.

Ang biktima mao si Hector Macoy, 38, panday nga nagpuyo sa maong lugar samtang padayon pang gipangita sa kapolisan ang usa ka lalaking daling misakay og motorsiklo ug misibat palayo sa lugar.

Matud ni PO2 Dionisio Tagopa sa Dumanjug Police Station dihang nahinabi sa Banat News ang biktima uban sa asawa ug mga anak nangatulog na dihang kini gipatay. Si Tagopa miingon nga ang mga silingan sa biktima nakadungog pagkakaadlawon nga dunay tawong nanampit sa biktima ug sa pagdagkot sa biktima sa lamparilya ug milili sa pultahan kalit kining gipusil duha ka higayon.

Ang biktima naigo sa walang bahin ubos sa ilok ug ang mamumuno kansang dagway wala maklaro tungod sa kangitngit daling midagan ug misakay og motorsiklo dayong misutoy palayo.

Dugang nahipos nga inpormasyon sa kapulisan ang biktima mamakyaway og trabaho sa balay apan giingong daghang nangreklamo tungod kay hutdon daan og kubra ang bayad apan dili tiwason ang trabaho tungod kay mobalhin na usab kini og laing trabaho. Hinuon gikonsiderar sa kapulisan ang tanang anggulo aron mailhan ang kriminal ug mahibaw-an ang motibo niini. (BANAT NEWS)