Juarez hadlok maunhan apan CHR moimbestigar

CEBU, Philippines - Giangkon ni PO2 Lea Juarez ang sakop sa Provincial Intelligence Branch (PIB) nga nakapatay og gipasanginlang tulisan niadtong Huwebes sa udto nga mao pa kadto ang unang higayon nga siya nakapusil og tawo sukad nga siya nahimong polis ug nahadlok siyang maoy maunhan.

Si Juarez maoy nakapusil patay sa 17-anyos nga si ‘Nano’, taga Tisa ning siyudad human sa ginukdanay niadtong Huwebes sa udto gikan diha sa Cebu Business Park hangtud sa dalan M. Velez St. , sa barangay Guadalupe human gitulis ni Nano ug Richard Baculi ang biktimang si Meychel Juntar,31, diha sa Cebu Business Park.

Matud ni Juarez nga usa kadto ka ‘call of duty’ kay gikan siya mitambong og court hearing sa Palasyo sa Hustisya ug miangkas siya sa motorsiklo ni PO1 Percival Perigo paingon sa Ayala kay mag-deposit unta siya og gamay’ng kwarta sa banko apan iyang nadunggan ang hilak sa usa ka babaye nga nangayog tabang kay siya gitulis.

Iyang gimanduan si Perigo nga mobalik sa agi aron gukdon ang motorsiklong gitudlo sa babaye nga gisakyan sa mga tulisan hinungdan sa nahitabong ginukdanay sa dalan Escario hangtud sa may Capitol Building.

Matud pa niini, na-corner ang duha apan inay motahan mikanaog si Nano sa motorsiklo ug misuway pag-ikyas hinungdan nga gigukod kini ni Juarez apan mibunot kini’g armas nga .45 pistol maong iyaha nalang giunhan pagpusil.

Human matumba dali niya kining gidala sa Vicente Sotto Memorial Medical Center (VSMMC) apan patay na kini, naigo kini sa tiyan.

“Lisod man og dili ko motubag, nakadungog ko sa hilak sa babaye nga nangayog tabang nga gitulis ko,”sumala pa ni Juarez.

“I don’t have any intention to kill him, ako unta siyang tiilon, pero what if mo-fire back siya,” dugang niya. Mitataw siya nga nabutang sa iyang hunahuna nga daghan pa siyang mabuhat nga kalampusan sa iyang panerbisyo ug duna sab siyay mga anak ug lisod nang siyay mabutang sa peligro.

Sa iyang bahin si Sr. Supt. Patrocinio Comendador, hepe sa kapulisan sa probinsya sa Sugbu nagkanayon nga iyang ilhon ug pasidunggan si Juarez karong Lunes. Giingong hasta si PO1 Perigo lakip usab sa pasidunggan. Samtang gikatakdang moimbestigar ang Commission on Human Rights sa maong hitabo pagtino kung nasubay sa balaod ang pagpusil ni Juarez sa maong suspek.  (BANAT NEWS)