Tinun-an naghikog

CEBU, Philippines - Napalgang patay ang usa ka babayeng gituohang naghikog sulod sa kwarto nga giabangang apartment sa iyang uyab kagahapon sa alas-10 pasado sa buntag diha sa Door 2 Catungal sa barangay Talamban ning siyudad.

Si Mary Grace Berde, 22, taga sitio Bayabas sa barangay Mambaling ug 3rd year sa kursong Bachelor of Science Interior Design, napalgan patay nga may higot nga pinutol nga tualya sa iyang liog.

Ang hinigugma niining si Don Jerson Javier,23,lumad nga taga Butuan City ug 4th year sa kolehiyo ug pareho og unibersidad dinhi sa dakbayan sa Sugbu nga gieskuylahan, maoy nakakita kang Berde nga wala nay panimuot.

Si PO2 Nilo Aventurado sa Homicide Section sa Cebu City Police Office (CCPO) nga nahinabi sa Banat News sa telepono kagahapon sa hapon nagkanayon nga galingkod sa sawog si Berde nga may higot ang liog sa pinutol nga tualya diin ang tumoy didto gihigot sa double deck nga higdaanan dihang napalgan kini ni Javier.

Si Javier ug ang ka boardmate niini maoy daling mihatud ni Berde ngadto sa North General Hospital apan gideklarar sa mga doktor nga dead on arrival (DOA).

Matud ni Aventurado nga niadtong petsa 7 nagsaulog sa adlaw’ng natawhan si Javier ug nag-inom sa mga higala lakip kang Berde sa usa ka convenience store diha sa Banilad.

Apan giingong nag-away si Javier ug Berde sa wala pa matinong rason ug mibiya si Berde ug misunod og pauli si Javier.

Matud pa ni Aventurado sa kapungot ni Berde giputol niini ang buhok didto sa sulod sa gipuy-an ni Javier.

Si Javier nakugang nalang pagkabuntag sa pagmata niini kagahapon nga mao nay kahimtang sa iyang uyab ang iyang namat-an nga dunay pinutol nga tualya sa liog nga gibulibod.

Ang kapolisan padayon pa sa imbestigasyon pagtino sa tinud-anay nga nahitabo sa maong kaso.(/EIM) (BANAT NEWS)