Sa kasaysayan karon

CEBU, Philippines - 1945—Gipahigayon ang 30 ka adlaw nga special session sa Kongreso sa Pilipinas human opisyal nga nakalingkawas ang Pilipinas gikan sa mga pwersa sa mga Hapon. Kini gitawag usab nga First Congress of the Commonwealth of the Philippines o Postwar Congress ug Liberation Congress diin nagtigom human sa giyera ang Senado ug Ubos Balay Balauranan. Kini usab ang adlaw diin gituki ang pormal nga paglingkod ni Presidente Sergio Osmeña hulip sa namatay nga si Presidente Manuel L. Quezon kinsa namatay didto sa Estados Unidos niadtong 1944. Ang maong Kongreso usab maoy naghatag og dalan nga subling nakabalik sa ilang mga trabaho ang lehislatura ug nasolusyonan ang mga problemang gibilin sa giyera. Diha usab nagsugod ang pagkaporma sa two-party system nga mao ang Nacionalista Party ni Quezon ug ang pagkaporma sa Liberal Party.

1968—Naghikog ang emperador sa Roma nga si Lucius Domitius Ahenobarbus nga nabantog sa pangalang Nero Claudius Drusus Germanicus o Emperador Nero pinaagi sa pagmando sa iyang kalihim nga si Epaphroditus nga gulgolon ang iyang liog aron makalikay sa silot nga gipahamtang kaniya sa Senado nga kamatayon pinaagi sa latigo. Si Nero nabantog sa pagka-liberal sa unang mga katuigan sa iyang pamunoan apan sa kadugayan nagpabaya kini ug mas giuna ang pagkahimong aktor, pagkanta, lipaylipay samtang nagkagubot na ang emperyo butang nga gikasagmuyo sa Senado.

1930—Gipatay ang reporter sa Chicago Tribune nga si Jake Lingle sa Illinois Central train station atol sa rush hour sa gibansagang “Leo Vincent Brothers” giingong gipapatay siya sa notado ug numero unong kriminal sa Estados Unidos nga si Al Capone tungod sa 100,000 dolyares niyang utang sa sugal.

1930—Natawo si Ben L. Abruzzo ang Amerkanong balloonist kauban nila ni Larry Newman, Ron Clark ug Rocky Aoki migikan sa Nagashimi, Japan niadtong Nobiyembre 10,1981 ug mitabok sa kadagatan sa Pasipiko nga walay hunong luwan sa balloon nga ‘Double Eagle V.’ Ang maong balloon susama kahabugon sa 13 ka andanang building nga gipaburot gamit ang helium gas. Mitugpa sila sa Mendocino National Forest, California nga 5,768 milya gikan sa Japan sulod lang sa 84 ka oras. Kauban usab si Abruzzo si Maxie Anderson ug Newman pagtabok sa dagat Atlantiko luwan sa Double Eagle II niadtong Agosto11-17 1978. Namatay si Abruzzo niadtong Pebrero 11,1985 dihang ang iyang gipilotong Cessna plane nahagsa sa Albuquerque.  (BANAT NEWS)