DUMAGUETE CITY, Philippines – Giklaro sa kapolisan sa lungsod sa Bacong, Negros Oriental nga ang pagpusil patay sa scuba diver nga usa usab ka tour guide ingon man ang security guard sa dive resort dili rub out bisan nitumaw sa imbestigasyon sa kapolisan nga ang usa sa mga biktima suspek sa pipila ka mga krimen sa maong lungsod.
Giklaro kini ni Sr. Insp. Edilberto Diocades, ang hepe sa Bacong police kinsa miingon nga human sa pagsusi sa pipila ka mga anggulo sa kamatayon nila ni Marlon Doño, 34, ug Stanley Torres, 27, nga taga Zamboanguita Negros Oriental wala nila ikonsiderar ang pagdudang rub out ang nahitabo.
Matud pa niini posibleng anggulo sa love triangle ang motibo o ba kaha binuhatan sa usa ka mabinantayong molupyo o mga molupyo nga nakabantay ug nakapakgang sa lain na usab unyang hitabo sa pagpangawat sa ilang dapit.
Sumala pa usab ni Diocades, si Torres natumbok sa intelligence operatives nga suspek sa mga pagpangawat sa maong lungsod, apan wala hinuoy bisan usa ka kasong napasaka batok niini.
Wala usab mangawala ang personal nga mga gamit sa duha maong wala sila magdudang biktima sa rub out ang mga biktima, hinuon duna nay mga gidudahang maoy responsable sa maong krimen apan wala ibutyag ang ilang mga pangalan sa kapolisan.
Si Doño ug Torres, parehong nagtrabaho sa usa ka resort sa Mayabon, Zamboanguita, luwan sa usa ka motorsiklo niadtong Martes sa gabii dihang sila gipamusil sa duha ka mga wala mailhing lalaking luwan usab og motorsiklo sa hilit nga dapit sa Barangay Combado, Bacong.
Sumala pang Diocades ang igsuon ni Torres mibutyag sa mga imbestigador nga nalambigit og ‘third party’ ang iyang igsuon hinungdan nga nagduda ang kapolisan nga posibleng love triangle ang motibo ug posibleng dunay mga nasukong mga residente sa Bacong nga nakapakgang kanila. (BANAT NEWS)