CEBU, Philippines - Hayan sugod karong tuiga kasugdan sa kagamhanan ang pagsusi pinaagi sa pagpaubos sa mga tinun-an sa high school ug college sa drug test.
Kini human mapalabang ang ordinansa sa hunta probinsiyal nga nagtinguha nga himuong naandan nga procedure ang pagpahigayon og random drug testing sa mga high school ug college students sa mga nagkadaiyang pampublikong tulunghaan dinhi sa lalawigan sa Sugbo.
Si Provincial Board member Carmen Remedios "Ivy" Durano-Meca nga mao usab ang nangulo sa Cebu Provincial Anti-Drug Abuse Council maoy nangamahan sa nahisgutang ordinansa.
Sumala niya nga pinaagi unya sa pagpatuman sa random drug testing ang mga tiggamitan og ginadiling drugas nga mga tinun-an masayran sa mga otoridad ug kahimoan dayon og lakang aron ma-rehabilitate sila.
Dugang pang katuyoan sa maong lokal nga balaodnon mao nga aron malikayan ang mga insidente sa sulod sa eskuylahan nga posibling himoon sa mga tinun-an nga nagumon sa ginadiling drugas.
Ang maong ordinansa padayon pa hinuon nga gitun-an sa Committee on Laws and Review on Ordinances sa hunta probinsiyal.(/WC) (BANAT NEWS)