Janitor nasakmita'g armas

CEBU, Philippines - Nasakmit sa mga sakop sa Special Weapon and Tactics (SWAT) sa Mandaue City Police Office (MCPO) ang usa ka armas de fuego gikan sa usa ka utility worker sa usa ka kompaniya nga nagbase sa sitio Sacris sa barangay Casuntingan sa dakbayan sa Mandaue human kini magpasalba sa miaging kaadlawon.

Ang suspetsado mao si Marlon Into, 27, minyo nga lumad nga taga lungsod sa Carmen ug temporaryong nagpuyo sa barangay Casuntingan sa maong dakbayan.

Si PO1 Ramil Eleazar sa Investigation Detection and Management Bureau (IDMB) sa Mandaue City Police Office (MCPO) nga nahinabi sa Banat News miingon nga ilang nadawat ang taho sa mga silingan kalabot sa usa ka tawo nga nagdala og 357 nga kalibre nga iyang gipabuto sa makadaghang higayon.

Dugang pa ni PO1 Eleazar nga dihang nahidangat sila sa maong lugar kuyog sa mga sakop sa SWAT ilang naabtan ang suspetsado nga nagbitbit pa    sa maong armas ug diha-diha ila kining gisakmit.

Matud pa niya nga walay lisensiya ang maong armas nga may upat ka mga buhing bala.

Ang suspetsado nga ilang gisukitsukit mitug-an nga ang maong armas maoy iyang panalipod sa kaugalingon batok sa dautang elemento sama sa   mga tulisan nga kalit lang motumaw sa panahon sa kagabhion. (BANAT NEWS)