Militanteng pundok nag-rally
CEBU, Philippines - Nag-rally ang mga militanteng pundok kagahapon sa buntag sa ganghaan sa Central Command agi og suporta nila sa priso nga si Ramon Patriarca kinsa nag hunger strike sugod niadtong Hunyo 1 ning tuiga.
Ang maong mga pundok mao ang miyembro sa AnakPawis,Karapatan Central Visayas ug Banay Muna.
Si Dennis Abarientos, tigpamaba sa Karapatan nga nahinabi sa mga tigbalita nagkanayon nga misuporta sila kang Patriarca human kini mohangyo nga ibalik siya sa Cebu Provincial Detention and Rehabilitation Center (CPDRC) gikan sa detention cell sa Central Command nga gibalhinan kaniya niadtong Enero 31 ning tuiga.
Si Patriarca nagkanayon nga gawas lang kun tumanon ang iyang hangyo, dili siya moundang sa iyang hunger strike.
Samtang sa iyang bahin ang tigpamaba sa Centcom nga si Lt. Col. Christopher Tampus nagkanayon sa mga tigbalita nga mopadala og suwat o rekomendasyon sa korte o kaha sa Kapitolyo nga ipa -transfer ngadto sa CPDRC si Patriarca.
Kini tungod kay matud pa ni Tampus ang ilang pasilidad dili prisohan sa mga high risk prisoner ug alang lang kini sa mga sundawong nagpabadlong sa ilang katungdanan.
Si Patriarca sa sayo pa nadakpan sa lungsod sa Consolacion duha na ka tuig ang nakalabay tungod sa kasong rebellion ug didto siya prisoha sa Danao City Jail apan gibalhin siya sa CPDRC human siya pasanginli nga maoy nangulo sa mga piniriso sa planong pag-alsa batok sa tagdumala sa maong bilanggoan. (BANAT NEWS)
- Latest
- Trending
