Sikyu nga gipatay nakasuwat pa sa pangalan sa mamumuno

CEBU, Philippines - Patay ang usa ka gwardiya ug naangol ang kauban niini human sila gipangdunggab sa duha ka mga lalaki kagahapon sa kaadlawon diha sa barangay Candulawan, dakbayan sa Talisay. Ang namatay kinsa nakahimo pa og “dying declaration” pinaagi sa pagsuwat sa pangalan sa mga suspetsado ug sa plate number sa getaway vehicle sa usa ka newspaper mao si Alejandro Masellones, 38, residente sa barangay Calajo-an, lungsod sa Minglanilla.

Ang kauban niining naangol mao si Joel Pareja, 42, taga barangay Carreta, dakbayan sa Sugbo, ang duha sakop sa NIMA Security Agency ug parehong nadestino diha sa Santa Lucia Subdivision sa barangay Candulawan. Si Pareja pulihan na unta ni Masellones niadtong tungora.

Ang shotgun sa maong mga gwardiya nga dunay walo ka buhing mga bala nga nagtangag sa serial number nga 1129960 gituohang gidala usab sa mga mamumuno.

Si Masellones nakaangkon og samad dinunggaban sa tuong bahin sa liog ug walang bahin sa buko-buko wala na makaabot nga buhi ngadto sa Talisay City District Hospital.

Samtang si Pareja nakaangkon og samad dinunggaban sa walang bahin sa nawong ug lawas gidala ngadto sa Minglanilla District Hospital.

 Si SPO1 Mikie Espina nga usa sa miresponde sa alarma nga nahinabi sa Banat News nagkanayon nga nakakita sila og newspaper nga nagkadugo uban sa usa ka ballpen diha sa lingkuranan sa guardhouse nga may gisuwat nga pangalan sa mga lalaki ug plate number sa sakyanan o motorsiklo.

Matud ni Espina base sa ilang imbestigasyon ang maong mga pangalan gisuwat ni Masellones human sila mangadunggabi.

Usa sa mga kauban sa duha nga nahinabi sa Banat News mibutyag kining ang usa sa pangalan sa nasuwat sa newspaper kapangalan sa usa sa mga kanunay makalalis sa mga biktima diha sa guardhouse.  (BANATNEWS)