Tulisan napusilan sa policewoman

CEBU, Philippines - Usa ka 17-anyos nga menor de edad nga lalaki nga gikan pang nanulis ang napusilan patay atol sa ginukdanay kagahapon sa udto diha sa uptown area.

Si Alex ‘Nano’ Cabunay,17, taga barangay Tisa ning siyudad napusilan ni PO2 Lea Juarez nga sakop sa Provincial Intelligence Branch (PIB) diha sa sitio Banawa, M. Velez St. , sa barangay Guadalupe kagahapon sa udto.

Si Cabunay gideklarar nga dead on arrival sa Vicente Sotto Memorial Medical Center (VSMMC) human nakaangkon og usa ka samad pinusilan sa tuong bahin sa iyang tiyan.

Matud ni PO2 Juarez nga gikan siyang mitambong sa hearing sa kaso sa illegal nga drugas diha sa Palasyo sa Hustisya sa dihang iyang nahibaw-an nga dunay tulis nga nahitabo diha sa Cebu Business Park. Siya misakay sa motorsiklo nga gimaneho ni PO1 Percival Perigo sa dihang nakadungog siya og hilak sa usa ka babaye nga nangayo og panabang.

 “When I turned, I saw a woman rolling on the pavement. I asked my buddy (motorcycle driver) to take a u-turn so we can help,”matud pang Juarez sa mga tigbalita.

Sa maong sitwasyon, iyang gimanduan si Perigo nga sundon ang motorsiklo nga gisakyan sa suspek uban sa kauban niini nga nadakpan ug nailhan nga si Richard Baculi nga maoy nagmaneho sa motorsiklo.

Atol sa ilang ginukdanay, na-corner ang mga suspek diha duol sa Capitol Building sa may M. Velez St., sa barangay Guadalupe ug giingong mikanaog ang angkas ug misuway sa pagdagan apan naapsan ni Juarez si Cabunay apan imbes nga motahan giingong mibunot kini sa kalibre .45 nga pistola hinungdan nga giunhan kini ni Juarez pagpusil kausa sa tuong bahin sa tiyan. “We faced each other for a second but he pulled his gun. I had no choice but to shoot him first before he (Alex) had a chance,” matud ni Juarez.

Narekober ni Juarez ang armas nga gigamit sa suspek ug ang cellphone ug pitaka sa biktimang si Reychel Juntar,31, kinsa paingong mokaon dihang gihunongan nila ni Cabunay ug gitulis.

Si Juntar nakaangkon og garas ug bun-og sa nagkadaiyang parte sa iyang lawas human siya misukol sa mga suspetsadong luwan sa Yamaha Mio nga nagtangag sa plakang 7141-GL.

Sa interview ni Baculi siya mitug-an nga gipugos siya ni Alex nga padraybon sa motorsiklo ug gipasaligan siya niining hatagan og bahin sa ilang mahimo sa ilang lakaw.

Hinuon ang mga imbestigador sa Theft and Robbery Section sa Cebu City Police Office (CCPO) nagkanayon nga si Baculi usa ka notadong tulisan nga nag-operate diha sa Cebu Business Park Area.  (BANATNEWS)