Nagaling sulod sa mixer

CEBU, Philippines - Nabalibali ang kabukogan sa usa ka helper sa himoanan og hollowblock human aksidenteng miandar ang mixer sa semento samtang ang biktima didto sa sulod nga naglimpyo sa maong makina diha sa ilang trabahoan sa sitio Eskina, Binabag barangay Estaca sa lungsod sa Compostela niadtong Miyerkules sa alas 7:00 sa gabii.

Ang patay nang naugkat sa iyang mga kauban mao si Jonathan Condina Rondina, 31, nagpuyo ra sa maong lugar ug helper sa John Joseph Hollowblocks and Merchandise nga gipanag-iya ni Cora Gom-os nga taga siyudad sa Lapulapu.

Matud ni PO2 Emil Rubilla sa Compostela Police Station dihang nahinabi sa Banat News ang biktima ug kaubang si Rodeil Bakadjay naglimpyo sa mixer human sa ilang paggamit. Giingong misulod sa mismong mixer ang biktima apan gikatahong dihang diha na kini sa sulod kalit lang miandar ang makina ug didto sa sulod nalambalamba si Rondina nga nagpunay og singgit sa pagpangayo og tabang.

Ang iyang kauban nga si Baladjay nga diha ra sa duol wala makapawong sa makina kay naratol ug midagan paingon sa gawas ug nangayo og tabang, ang laing trabahante nga si Renelito Rojo mao nay mipawong sa linya sa kuryente aron mohunong og tuyok ang orbit sa maong mixer.

Apan sa ilang pagsusi kang Rondina nalukot na kini sa ilawom ug nabulit og dugo ug semento ug balas ug wala nay kinabuhi dihang ilang gihaw-as.

Ang kapulisan mohimo pa og dugang pakisusi sa maong panghitabo kun gibinuangan ba ang biktima o aksidente lang gyud ang nahitabo. (/EIM)  (BANAT NEWS)