HILONGOS, LEYTE, Philippines – Nakaeskapo ang suspek sa brutal nga pagpatay sa barangay kagawad ug sa duha ka mga anak niini pinaagi sa pagguba sa rehas sa prisohan sa kapolisan sa Hilongos.
Ang nakaeskapo giilang si Romualdo Merino, giingong nag-inusara kini sa maong prisohan ug nakahigayon sa pagbawog sa rehas nga maoy gitaptan sa kandado sa maong karsel nga wala mabantayi sa pipila ka mga polis nga nahibilin tungod kay kadaghanan nagbantay sa mga nagpistang barangay.
Si Chief Insp. Virgilio Plaza, OIC-chief sa Hilongos Police Station, mibutyag sa Banat News nga nagpadayon pa ang manhunt operation batok sa pugante. “Our force is constantly on the move to bring back Merino,” matud pa niini kinsa midugang nga ang mga polis nga nagbantay atol sa pag-eskapo gipaesplikar na sa nahitabo.
Samtang si Mayor Jose Emery Roble,mipahibalong adunay gitaganang ganti sa si bisan kinsang makahatag og impormasyon aron madakpan pagbalik ang pugante kinsa gikunsiderar nga peligroso alang sa publiko ang pag-ikyas niini, hinuon wala pa kini motug-an kun pila gyuy ganti.
Si Merino uban sa laing tulo ka mga tawo ang gitumbok nga mibanhig kang barangay kagawad Vicente Lor ug duha niini ka mga anak nga lalaking nagpangidaron og 4 ug 6-anyos samtang sila luwan og motorsiklo padulong unta mangaligo sa suba niadtong milabay’ng bulan.
Gamit ang usa ka pugakhang ang tulo pulos gipamusil sa ulo nga nakapabungkag niini sa dalan. Ang usa sa mga anak ni Lor milagrong naabtan pang buhi og nadala sa tambalanan ug nakatug-an pa si kinsa ang mga mamumuno nga ilaha rang kabarangay. (BANAT NEWS)