Sa kasaysayan karon

CEBU, Philippines - 1724— Natawo ang English civil engineer nga si John Smeaton kinsa maoy unang mipaila sa trabahong ‘civil engineering’ dihang siya ug mga sibilyang trabahante mitukod sa ikatulong Eddystone Lighthouse (parola) sa Plymouth sa Devon didto sa Englatera. Kaniadto ang mga engineers sagad mga military engineers lamang, apan tungod sa nakitang maayong pagtrabaho sa mga sibilyang engineers nabuwag na isip managlahing grupo ang military engineers ug civilian engineers. Pipila sa mga karaang mga taytayan, great canals, pantalan, ug mga parola sa Scotland nga hangtud karon nagbarog pa ginama ni Smeaton.

1783 — Miulbo ang Mt. Laki sa nasud sa Iceland, ang pagbuto ug pagbugwak niini og lava ug abo sa maong nasud milanat og walo ka bulan nga mikalas og kapin sa 9,000 ka tawo ug nagbunga og pito ka tuig nga kadaot sa mga dapit palibot niini nga naglakip sa kakulang sa pagkaon, pagkamatay sa mga hayop, pagdaghan sa mga nasakit ug uban pa.

1968— Nadakpan si James Earl Ray, usa ka pugante sa Amerika ug maoy gitumbok nga killer ni Martin Luther King ang Amerkanong negro nga maoy nangulo sa mga Black Americans aron mahatagan sila og patas nga pagtratar sa gobiyerno. Si King gipusil sa usa ka sniper samtang nagbarog sa balkonahe sa Lorraine Motel sa Memphis, Tennessee.Si Ray gamit ang mini nga pasaporte sa Canada ilawom sa pangalan nga Ramon George Sneyd. Duha ka buwan kapin gikan sa pagpatay kang King nadakpan si Ray sa Heathrow Airport sa London, sa United Kingdom. Napalpak si Ray sa apelyedong Sneyd tungod kay wanted pud diay kini sa Royal Canadian Mounted Police. Human madiskubrehi ang iyang tinud-anay nga pagkatawo gi-deport si Ray sa Amerika ug gipasakaan og kaso sa pagpatay kang King ug nahukmang mabilanggo og 99 ka tuig, nadugangan kini og usa ka tuig dihang kini nakaeskapo apan nadakpan pagbalik. (BANAT NEWS)