1952— Gibahin ang Zamboanga ngadto sa duha ka probinsya nga mao na karon ang gitawag nga Zamboanga del Sur ug Zamboanga del Norte pinasikad sa gipasar nga balaod nga Republic Act 711.
1944—Niining petsaha gilusad sa Allied Forces ang Operation Overlord nga mao ang nabantog nga D-Day sa Ikaduhang Kalibutanong Gubat. Kini ang labing dakong amphibious military operation sa kasaysayan dihang milabang sa English Channel ang mga tropa sa Allied Powers ug midahik sa kabaybayunan sa Normandy, France aron abugon ang mga Germans nga gipangulohan ni Adolf Hitler. Hunyo 5, 1944 gipagawas ni U.S. General Dwight D. Eisenhower, ang Supreme Allied Commander sa Uropa, nga atakehon na ang Germany. Gibanabang 6,000 ka landing craft, mga barko ug uban pang sakyanang panggubat sa kadagatan nga dunay 176,000 ka tropa ang mibiya sa England padulong sa Normandy. Pagkahuman sa tibuok adlaw nga kombate nailog sa Allied Forces ang Normandy apan 155,000 nalang ka sundalo ang buhi nga walay tatsa. Ang mga baybayong nailog sa maong adlaw mao ang Gold, Juno ug Sword pinaagi sa mga tropang British ug Canadians samtang naglisod ang Amerkano sa Omaha Beach diin 2,000 kapin sa ilang mga sundalo ang nakalas.
1932—Natawo ang Amerkanong austronaut si David Scott nga nahimong unang tawo nga nakamaneho og sakyanan nga gitawag nga Lunar Rover sa patag sa bulan niadtong Hulyo 31,1971. Migikan sa Earth ang Apollo 15 mission luwan si Scott niadtong Hulyo 26, 1971 alang sa ikaupat ka higayon nga lunar landing sa tawo didto sa buwan. Siya maoy nahimong ikapitong tawo nga aktwal nga nakatamak ug nakalakaw sa bulan ug labing unang tawo nga nakamaneho og sakyanan didto. Atol sa maong misyon nagdala og 77 kilo bato gikan sa bulan ang grupo aron matun-an ug nagbilin og science monitoring station didto.