Sa Marcelo Fernan Bridge hinay apan walay aberya ang trapiko

CEBU, Philippines - Bisan hinay ug dunay higayong mag-aginod ang dagan sa mga sakyanan gihulagway sa City Traffic Management System (CTMS) nga hapsay ang dagan sa trapiko sa unang adlaw sa pag-ayo sa Marcelo Fernan Bridge bisan gisirad-an ang usa ka lane niini tungod sa repairs nga gibuhat sa Department of Public Works and Highways.

Ang maong taytayan maoy usa sa duha ka taytayang nagkonektar sa dakbayan sa Lapulapu ug sa mainland Cebu partikular ang dakbayan sa Mandaue ang maong mga taytayan maoy agianan sa komersyo ug mga pasahero nga mosakay sa Mactan-Cebu International Airport.

Si CTMS Director Frank Brazil sa pakighinabi sa Banat News miingon wala kaayoy nasinating grabe kabug-at nga trapiko sa unang adlaw (Lunes) sa pagpasira sa pikas lane, hinuon giangkon niyang sa peak hours mihinay gyud ang dagan sa mga sakyanan.

Sa tulo ka linya sa dalan sa maong tulay padung ngadto sa Mandaue usa lamang ka linya niini ang gibutangan og barikada tungod sa gitrabaho sa DPWH nga pag-ilis sa rubberized joints. Samtang si Nimrod Almosida sa Traffic Enforcement Agency of Mandaue (TEAM) nga nahinabi sa Banat News miingon nga ang mga dalan nga nagpaingon sa Marcelo Fernan Bridge ug Mactan -Mandaue Bridge gibutangan na og mga traffic enforcers.

Kini aron kalikayan ang mga motorista nga mag-ilogay sa pag-agi nga makaingon hinuon sa aksidente ug mosamot kabara ang trapiko.  

Matud pa ni Almosida bisan ang Mactan-Mandaue Bridge naghuot usab tungod kay ang ubang mga sakyanan adto man moagi.

Ang pagpasira sa Marcelo Fernan Bridge alang sa repairs niini nabulahan usab ang ferry boat service nga magbiyahian sa dakbayan sa Lapulapu ug Mandaue sanglit adto naman manakay ang mga pasaherong nabalakang madelatar sa ilang pagtabok sa Mactan Channel.

Gibanabanang moabot sa 88 ka adlaw nga trabahuon sa DPWH ang maong taytayan nga gibahin ngadto sa unom ka hugna aron dili gyud hingpit nga masirad-an ang tibuok taytayan. (Bong Soriano ug Romeo Limpangog/EIM)(BANAT NEWS)