Gipatol samtang namasol nalumos

CEBU, Philippines - Nalumos ang usa ka mag-uuma dihang gisul-an sa iyang sakit nga patol samtang namasol sa daplin sa baybayon sa barangay Candaguit sa lungsod sa Sibonga niadtong Lunes sa alas 4:30 sa hapon.

Ang nakalas sa dagat mao si Virgilio Ramos Caban, 62 , minyo, usa ka mag-uuma nga nagpuyo sa bukirang bahin sa barangay Mangyan sa maong lungsod

Si PO3 Ederlino Bacusmo sa Sibonga Police Station mibutyag sa Banat News nga milugsong sa dagat si Caban uban sa iyang duha ka mga batan-ong anak nga si Vircenia, 13, ug Marycris, 12, aron mamasol sa taga hawak nga giladmon sa dagat sa baybayon sa Candaguit.

Apan samtang nagpaabot kini nga kubiton sa isda ang iyang pasol ,kalit lang gisul-an sa iyang sakit nga patol busa natumba kini sa tubig nga maoy hinungdan sa iyang pagkalumos.

Ang iyang duha ka gagmay’ng anak, wala makatabang kaniya apan midali kini pagpauli sa ilang balay sa bukid ug misugilon sa ilang inahan sa nahitabo sa ilang amahan.

Pag-abot sa iyang mga kabanay , si Caban nakabsan na sa kinabuhi ug ila nalang gi-report sa kapolisan sa lungsod ang nahitabo.

Girekomendar   sa kapolisan nga ipaubos sa autopsy ang lawas patay ni Caban pagtino nga wala kini tuyoa sa pagpatay. (/WC)(BANAT NEWS)