Kanonisasyon Mahinayon sa SRP ang Thanksgiving Mass

CEBU, Philippines - Sa South Road Properties na sa dakbayan sa Sugbu ipahigayon ug di na sa Mandaue ang Thanksgiving Mass atol sa kanonisasyon ni Beato Pedro Calungsod ug sugdan na ang konstruksyon sa temporaryong estraktura sa venue karong sunod semana. 

Si Archbishop Emeritus Ricardo Cardinal Vidal nagkanayon kagahapon nga ang pag-develop sa lugar giangkon na sa SM ug kini mahimong matambongan og usa ka milyon ka tawo.

Gilauman nga 50 ka mga church dignitaries ang motambong sa nahisgutang misa, 100 ka mga lider sa gobiyerno ug society leaders, 300 ka mga arsobispo, 700 ka mga pari, 2000 ka choir ug 200 ka orchestra.

Gawas sa 1,500 square meters nga templete, ang venue duna kini vesting area, operation center, press center, police ug society center, power lines, media stand, wide screen, blessed sacrament chapels, souvenir stores, first aid stations, water stations, mga stalls sa pagkaon ug portable toilets. Dunay offsite parking usab alang sa church dignitaries, sa mga tiguwang ug sa mga dunay kakulian sa panglawas, mga bus alang sa out of town ug Cebu pilgrims ug sa ambulansiya, fire trucks ug polis.

Si Arsobispo sa Sugbo Jose Palma malipayon kaayong nagpahibalo nga wala na sila magproblema alang sa budget sa kalihukan apan wala siya mobutyag kung pilay igahin sa simbahan ug sa nadawat nilang mga donasyon. (BANAT NEWS)