Husay sa mga Oliva ug TF Alpha nagpadayon

CEBU, Philippines - Nag-atubang na kagahapon sa buhatan sa Land Transportation Office-7 sila si Cebu City treasurer Ofelia Oliva ug sa usa sa mga sakop sa Task Force Alpha nga si Stephen Ybañez.

Si Oliva uban sa iyang anak nga si Karen Olvido gipangayoan og habig sa legal officer sa LTO nga si Atty. Vicente Gador Jr. bahin sa reklamo nila batok sa grupo ni Ybañez niadtong nakalabay’ng mga adlaw diha sa dalan Escario sa barangay Camputhaw ning dakbayan nga nagkagubot.

Si Oliva kusganong mibarog nga gisinghagan ni Ybañez ang iyang anak nga si Karen dihang ang naulahi nga luwan sa awto ilang gipahunong tungod kay wala magsiga ang suga niini.

Ang pagpatawag kanila kabahin sa gihimong imbestigasyon sa LTO sa maong insidente ug gituki ang giingong traffic violations ni Olvido.

Giklaro hinuon ni Oliva nga andam nilang atubangon ang mga kalapasang nahimo sa iyang anak apan miinsister siya nga ang ilang reklamo dili ang pagdakop sa iyang anak kondili ang pagka-arogante ni Ybañez.

Matud pa ni Oliva dili maayong ehemplo ilabi na sa usa ka traffic enforcer ang pagka-arogante og pamatasan niini ngadto sa mga tawo, si Ybañez dili organic o kawani sa gobiyerno sanglit usa lamang kini ka deputized agent sa LTO.

Gitun-an na sa mga abogado ni Oliva ang kasong ipasaka batok kang Ybañez.

Samtang ang team leader sa Task Force Alpha nga si Celestino Arnaiz midepensa sa iyang tawo sa pag-insister nga wala gyud maningka si Ybañez.

Sumala pa ni Arnaiz nga nag-agi gyud og mga trainings ang mga sakop sa Task Force Alpha ug pinasubay sa balaod ang ilang pagtrabaho. (BANAT NEWS)