Traffic enforcer gi-ambush patay

CEBU, Philippines - Patay diha- diha ang usa ka traffic enforcer nga nag-sideline pagpamasahero og habalhabal human kini gi-ambusan sa iyang pagpauli diha sa barangay Tamiao sa lungsod sa Compostela niadtong Lunes sa alas 9:00 sa gabii.

Ang biktima nga wala na madala pa sa tambalanan mao si Eugene Balansag, 55, traffic enforcer sa Compostela, padayon pa ang kapolisan pagtumbok sa responsable sa krimen.

Matud ni PO2 Arnie Goc-ong, ang imbestigador sa Compostela Police Station nga nahinabi sa Banat News ang biktima pabalik na sa lungsod gikan naghatod og pasahero sa sitio Tamiao-2 apan giatangan sa mingaw nga lugar ug gipaulanan og bala.

Naigo ang biktima sa ubos nga bahin sa iyang tuong ilok, dughan ug ulo ug nadiretso og katumba uban sa motorsiklo samtang ang mamumuno daling nakabiya sa lugar. Nakuha sa kapolisan sa crime scene ang tulo ka kabhang sa kalibre .45.

Ang kapulisan padayun pa karun sa gihimong follow-up operation pagtumbok sa suspek ug motibo sa krimen nga gituohang ang motibo personal ug work related tungod kay posibleng duna kini gikasungi tungod sa iyang trabaho isip traffic enforcer.

(BANAT NEWS)