Hepe sa TCPS mihimakak nga siya 'protektor'

CEBU, Philippines - Ang hepe sa kapolisan sa dakbayan sa Talisay mibahad nga mas hugtan niya karon ang paggukod sa ilegal nga drugas sa siyudad human siya gipasanginlang siya maoy protektor sa ginadiling drugas sa maong siyudad.

Gihagit usab sa hepe ang nagpadala og suwat ngadto sa Philippine Drug Enforcement Agency-7 ug usab sa usa ka kolumnista sa Banat News nga namasangil kaniya sa pagluwat og affidavit ug pamatud-an ang pasangil niini batok sa maong opisyal. Si Recamara gipasanginlang protektor sa usa ka tawong giingong ‘nagpadagan’ sa illegal nga drugas sa barangay Tangke ug ang usa sa iyang polis daw maoy gihimong ‘runner’ niini ngadto sa maong tawo.

Ang maong tawo giingong mao say ‘nagpadagan’ usab sa negosyo sa illegal nga drugas sa Toledo, Minglanilla, Pasil ug Ermita sa dakbayan sa Sugbu.

Apan si Recamara nagkanayon nga duna siya’y katahap nga personal ang motibo sa maong pasangil kaniya tungod kay niadtong buwan sa Pebrero dunay tawong mipadala og suwat ngadto kang Chief PNP Director General Nicanor Bartolome nga susama gihapon og pasangil kaniya.

Matud pa ni Recamara nga niadtong buwan sa Mayo iyaha nang natubag ang maong pasangil, sa gihimo niyang imbestigasyon dunay tawo nga iyahang gidudahan karon nga maoy nagpasiugda niini nga usa gihapon ka polis nga escort sa usa ka pamilya sa dakbayan sa Talisay.

Si Recamara nagkanayon nga wala siya matandog sa maong pasangil apan mibahad kining pahugtan pa hinuon niya ang paggukod sa mga ilegal nga drugas sa siyudad aron malimpiyo ang iyang pangalan. (BANAT NEWS)