77 ka paresan gikasal sa Mandaue

CEBU, Philippines - Nagbinayloay sa ilang panaad pinaagi sa sagradong kasal ang 77 ka paresan sa gipasiugdahang mass wedding sa dakbayan sa Mandaue nga gihimo diha sa St. Joseph National Shrine Parish Church kagahapon sa buntag.

Si Mayor Jonas Cortes ug ang kapikas niini nga si Sarah Cortes ug mga konsehal maoy nahimong ninong ug ninang sa mga gikasal kagahapon.

Human makompleto sa mga paresan ang ilang rekisitos sa balaod ug sa simbahan natuman na gyud ang ilang gipangandoy nga bendisyon sa ilang panag-uban kagahapon.

Kasagaran sa mga gikasal nag-ipon na sa dugay’ng panahon ug karon pa lamang kini nakadesider nga magpakasal aron mahimong legal na ang ilang panagpuyo sa ngalan sa balaod ug sa Diyos.

Nasuta sa Banat News nga ang pinakataas og edad nga gikasal mao si Gregorio Perez ,58, nga naminyo ni Julia Bragat, 28, human sa ilang walo ka tuig nga panag-ipon ug nakabaton na kini og usa ka anak.

Laing paresan mao ang managsuon nga nagkadungan og pakasal nga sila si Romeo Solon ug ang asawa niini nga si Maricor human sa ilang napulo ka tuig nga panag-ipon ug ang maguwang niini nga si Ramir Solon ug asawa niining si Faith Hyacinth human usab sa ilang upat ka tuig nga panag-ipon.

Ang kasal gi-officiate ni Msgr. Arthur Navales sa St. Joseph National Shrine Parish ug pagkahuman gipahigayon usab ang usa ka salosalo sa mga gikasal ngadto sa Mandaue Sports and Cultural Complex.    - BANAT NEWS