CEBU, Philippines - Usa sa mga kanhi tinun-an sa Saint Theresa’s College (STC) nga wala tuguting makapaso sa pagtapos niya sa high school sa maong tunghaan tungod sa pasangil sa kadagkoan sa maong eskuylahan nga nakahimo og malaw-ay nga buhat tungod sa gi-post sa internet gikatahong dili una mopadayon sa pagtungha sa kolehiyo.
Sa pakighinabi sa Banat News kang Atty. Cornelio Mercado, legal counsel sa tinun-an mibutyag nga mipahibalo kaniya ang ginikanan sa bata nga dili una kini motungha.
Matud pa ni Mercado nga wala usab siya masayod sa tinuoray nga hinungdan sa pagdumili og tungha sa batan-on apan adunay pagdudang na-traumatized kini sa eskandalo.
“ I don’t want to speculate lang ha, but that’s what they told me nga dili sa mo-eskwela karun,” pasabot pa ni Mercado
Dugang pa ni Mercado nga wala siya magdahom nga dili diay motungha ang batan-on tungod kay una niyang nasayran nga magpa-enroll na kini apan mao nalang iyang nasayran nga di na kini mopadayon.
“What I’ve heard di lang pod mopadayon og enroll,” dugang pang Mercado.
Butyag usab ni Mercado nga ang pamilya sa batan-on mikuha og psychiatric assistance apan wala siya masayod ug kun unsay hinungdan niini.
Sa pagkakaron kasamtangan pang nagpaabot ang kampo ni Mercado sa na-pending pa nilang kaso sa buhatan sa Prosecutors Office.
Kahinumduman nga hilabihan nga naglanog-lanog ang ngalan sa tunghaan nga STC niadtong buwan sa Marso human lima ka tinun-an niini sa high school department ang wala tugti nga makapaso tungod sa giingong nakalapas sila sa rules and regulation sa tunghaan. ( /EIM) - BANAT NEWS